大笨象究竟「打完仗」定「打唔贏」?

Matthew SUNG, 劉擇明

Research output: Contribution to conferencePapers

Abstract

前排 ViuTV 節目《空肚講宵夜》入面提到「大笨象,揸枝槍,去打仗,〇〇〇,返嚟食碗辣椒醬」呢句嘢,中間三隻字有地區差異,九龍新界就會講「打唔贏」,港島就講「打完仗」。我哋就「『大笨象,揸枝槍,去打仗』下一句係咩」進行咗一個網上問卷調查,最終收集到超過萬二個回覆。
我哋今次嘅研究主要係想知道:1)「打唔贏」同「打完仗」呢兩句嘢邊句出現先?2)遲啲出現嗰句嘢係幾時開始出現? 3)新界九龍同港島嘅變體係唔係真係有對立?
我哋嘅分析已經有咗初步嘅結果。我哋首先利用回覆裡面嘅線索(幼稚園定小學開始聽到呢首童謠)去推斷受訪者對於呢首童謠嘅接觸年份。我哋嘅調查發現,「大笨象,揸枝槍,去打仗」下一句最初係「打唔贏」。喺二十世紀二十年代之前已經有人講「打唔贏」。雖然我哋數據唔係多,但係我哋發現「打完仗」係後起嘅,而咁啱又喺二戰結束後先出現。
我哋用地圖分年代去顯示同分析收集返嚟嘅數據。「打完仗」喺港島就係從嗰陣時開始流行。喺九龍同新界,「打完仗」都唔係完全冇人講嘅,但只係佔好少數。喺七十同八十年代,「打完仗」喺港島嘅使用率達到高峰,達致八成。但到咗九十年代,「打唔贏」同「打完仗」喺小學同幼稚園已經扯成平手。九龍同新界就一直都係講「打唔贏」為主。整體嚟講,喺七十同八十年代九龍新界同港島係有明顯既對立,亦即係六十尾到八十年代初出世嘅人士最容易察覺呢個對立。 Copyright © 2020 FoCaL-3.
Original languageChinese (Traditional)
Publication statusPublished - Jun 2020

Citation

Sung, M.和劉擇明(2020.6):大笨象究竟「打完仗」定「打唔贏」?論文發表於「第三屆粵語語言學論壇」,香港恒生大學,香港,中國。